Дзясяткі тысяч аўстралійцаў шукаюць прытулку ад агню - у некалькіх штатах бушуюць лясныя пажары, і ўлады прызнаюць, што ў двух раёнах узгараньне настолькі моцнае, што людзям, якія там апынуліся, «ужо позна ўцякаць».
Зараз у краіне зафіксавана 78 пажараў. Урад абвясьціў «катастрафічны» ўзровень небясьпекі, ужо вядома аб трох загінулых. Зьнішчаныя паўтары сотні дамоў. Ахоплены агнём лес у Аўстраліі - зусім ня рэдкасьць, але цяперашняя сытуацыя выходзіць за рамкі звыклага - такога ня бачылі дзесяцігодзьдзі.
Пад пагрозай нават Сіднэй - самы густанаселены горад краіны. Моцныя пажары выкліканыя беспрэцэдэнтным спалучэньнем высокай тэмпэратуры і моцнага ветру.
