Для Беларусі дастаткова 15 існых палітычных партый, лічыць міністар юстыцыі Алег Сьліжэўскі.
Адказваючы на пытаньне Свабоды пра тое, чаму больш як за 15 гадоў у Беларусі не зарэгістравалі ніводнай новай палітычнай партыі, міністар Алег Сьліжэўскі заявіў:
«Асноўная праблема — у неабходнасьці сабраць мінімальную колькасьць заснавальнікаў. А гэта 1 тысяча чалавек. Не памыляюся, калі ва ўсіх выпадках пытаньні ўзьнікалі да складу заснавальнікаў. У сьпісах былі альбо мёртвыя душы, альбо людзі, якія паняцьця ня мелі, што яны зьяўляюцца заснавальнікамі партыі».
Міністар паведаміў, што ў Беларусі дзейнічаюць 15 палітычных партый.
«Для нашай краіны гэта дастаткова для працы актыўным грамадзянам у розных кірунках. Вельмі складана знайсьці тых, хто падтрымае новую партыю. Актыўныя грамадзяне альбо ўжо занялі сваё месца ў іншых партыях, альбо не жадаюць наагул займацца палітыкай», — сказаў Сьліжэўскі.
У Беларусі афіцыйная рэгістрацыя палітычных партый і грамадзкіх аб’яднаньняў ускладзеная менавіта на Міністэрства юстыцыі.
Апазыцыйныя арганізацыі, у прыватнасьці Беларуская хрысьціянская дэмакратыя, неаднаразова скардзіліся на адмовы ўладаў зарэгістраваць іх.
